အချိန်ရှိခိုက်၊ လုံ့လစိုက်၊ မမိုက်သင့်ပေ၊ ဒို့တစ်တွေ။

Sunday, July 1, 2012

ခေါင်းဆောင်ကောင်းတို့ ကျင့်စဉ် (၅)

ခေါင်းဆောင်ကောင်းတို့  ကျင့်စဉ် (၅)

ထိုက်တန်သူရွေး တာဝန်ပေး

ပညာသမ္ပဇဉ်၊ ဥာဏ်မယှဉ်ဘဲ၊ ဥယျာဉ်သည်မိုက်၊ စရိုက်မကောင်း၊ မျောက်အပေါင်းကို၊ ရေလောင်းခိုင်းငြား၊ ကျိုးပျက်ပြား၏၊ တရားအမြစ်၊ စစ်သော်တမူ၊ အရင်းယူက၊ ခိုင်းသူအမိုက်၊ ကဲ့ရဲ့ထိုက်၏။ ။(မဃဒေ၀)
*****
          ဘီစီ ၃-ရာစုခန့်တွင် အိန္ဒိပြည်၌ အသောကမင်း အုပ်ချုပ်၏။ အသောကမင်းသည် ဗုဒ္ဓသာသနာကို ချီးမြှောက်ရာတွင် လွန်စွာနာမည်ကြီးလှသူဖြစ်သည်။ ဗုဒ္ဓဘာသာနှင့်ပတ်သက်သော သမိုင်းအစောင်စောင်တို့တွင် အသောကမင်းအကြောင်းကို ပြည့်ပြည့်စုံစုံ ခိုင်ခိုင်မာမာဖြင့် မှတ်တမ်းတင်ထားသည်။ မြန်မာလူမျိုးတို့သည်လည်း အသောကမင်းကို ကိုယ့်တိုင်းပြည်တွင် အုပ်ချုပ်ခဲ့သည့် မင်းတစ်ပါးအလား သိကြသည်ဟု ဆောင်းပါးတစ်ပုဒ်တွင် ဖတ်ခဲ့ရဖူးသည်။ မှန်လှပေသည်။ မြန်မာတို့သည် အသောကမင်းအကြောင်းကို ထဲထဲဝင်ဝင်မဟုတ်တောင် ကြားဖူးနားဝတော့ ရှိဖူးကြသူများဖြစ်သည်။ စေတီပေါင်း ရှစ်သောင်းလေးထောင်၊ ရေတွင်း-ရေကန်ပေါင်း ရှစ်သောင်းလေးထောင် စသည့်စသည့်အချက်များသည် အသောမင်းနှင့် တွဲလျှက်သိစေသော အချက်များထဲမှ အချို့ဖြစ်သည်။
          ထိုအသောကမင်းကြီးသည် တာဝန်ပေးရာနှင့်ပတ်သက်ပြီး ကြီးမားလှသော အမှားကြီးတစ်ခုကို ကျူးလွန်ခဲ့သည်။ မင်းကြီးကိုယ်တိုင် လှူဒါန်းထားသော အသောကာရာမကျောင်းတိုက်ကြီးတွင် သီတင်းသုံးနေကြသော ရဟန်းတော်များ ဥပုသ်ကံများ မပြုသည်မှာ ခုနှစ်နှစ်ပင်ကြာနေပြီဖြစ်ကြောင်း မင်းကြီးသိရ၍ အမတ်တစ်ဦးအား ရဟန်းတော်များ ဥပုသ်ကံများပြုနိုင်စေရန် လိုအပ်သည်များဆောင်ရွက်ဖို တာဝန်ပေးလိုက်သည်။
          တစ်နည်းဆိုရသော် ဥပုသ်ကံပြုခြင်းဆိုသည်မှာ ညီညွတ်စွာနှင့် စုပေါင်းလုပ်ရသည့် လုပ်ငန်းမျိုးဖြစ်၍ အချင်းချင်းကွဲပြားနေသော သံဃာတော်များကို ဓမ္မစက်ဖြင့် ငြိမ်းချမ်းရေးမရနိုင်၊ ညီညွတ်မှုမရနိုင်ဟု ယူဆသောကြောင့် အာဏာစက်ဖြင့် စေခိုင်းခြင်းဖြစ်သည်။
          ထိုအမတ်သည် ရဟန်းတော်များအား ဥပုသ်ကံများပြုကြရန် လျှောက်ထားသော်လည်း မပြုကြသည့်အတွက် စိတ်ဆိုး၏။ အဘယ်ကြောင့် မပြုရသည်ကို စုံစမ်းမေးမြန်းခြင်းမလုပ်ဘဲ ဥပုသ်မပြုသော ရဟန်းတော်များအား သတ်စေသည်။ ဤတွင် အကျင့်သီလနှင့်ပြည့်စုံသည့် များစွာသော ရဟန်း၊သံဃာတော်များ အသတ်ခံရလေသည်။
တာဝန်ရှိသူသည် သက်ဆိုင်ရာနယ်ပယ်တွင် အကျွမ်းတ၀င်ရှိဖို့လိုသည်။ ထို့အတူ တာဝန်အပ်နှင်းသူမှာလည်း မိမိတာဝန်ပေးမည့်သူ၏ စွမ်းဆောင်နိုင်မှုနယ်ပယ်ကို သိဖို့လိုသည်။ ပြင်၍မရနိုင်သည့် အထက်ပါဖြစ်ရပ်မျိုးသည် တာဝန်အပ်နှင်းရာတွင် လူမှန်၊နေရာမှန်ဖြစ်ဖို့ အရေးကြီးကြောင်း ထင်ရှားသော သက်သေသာဓကဖြစ်သည်။
*****

ခေါင်းဆောင်ဆိုသည်ကို ဥယျာဉ်မှူးပမာ တင်စားပြောရမည်ဆိုလျှင် တိုင်းသူပြည်သားတို့သည် ထိုဥယျာဉ်မှူး၏ ဥယျာဉ်အတွင်းမှာ ရှင်သန်ရသော အသီး၊ အပွင့်၊ အပင်-စသည်တို့သာ ဖြစ်သည်။ ဥယျာဉ်ကြီး သာယာလှပဖို့၊ စိမ်းလန်းစိုပြည်ဖို့၊ ဖူး-ပွင့်-ဝေဆာဖို့ဆိုသည်မှာ ဥယျာဉ်မှူး၏ မှန်ကန်သော ပြုစုစောင့်ရှောက်မှုအပေါ်၊ သင့်တော်သော ဂရုစိုက်မှုအပေါ်တို့တွင် များစွာမူတည်ပေသည်။
          သို့တစေ ဥယျာဉ်မှူးသည် ဥယျာဉ်ကို ကိုယ်တိုင်ကိုယ်ကျအနေဖြင့် အမြဲတမ်း ကြည့်ရှုစောင့်ရှောက်နိုင်ချင်မှ စောင့်ရှောက်နိုင်ပေလိမ့်မည်။ အောက်လက်ငယ်သားများသာ များသောအားဖြင့် ဂရုစိုက်ရပေလိမ့်မည်။ ရံခါတွင်သာ တိုက်ရိုက်ကြည့်ရှု စစ်ဆေးနိုင်ပေလိမ့်မည်။ မည်သို့ပင်ဖြစ်စေ ဖြစ်သမျှအကောင်း၊အဆိုးသည် ဥယျာဉ်မှူးအား တိုက်ရိုက်သက်ဆိုင်၍ မိမိတာဝန်ပေးမည့် အောက်လက်ငယ်သားသည် ယုံကြည်ထိုက်သူဖြစ်သင့်ပေသည်။ ထိုဥယျာဉ်ကို ထိန်းသိမ်းစောင့်ရှောက်ဖို့ အမှန်တကယ်ထိုက်တန်သူဖြစ်ဖို့ လိုပေသည်။
*****
          မြတ်စွာဘုရားနှင့် သံဃာတော်များ ကောသလတိုင်းတွင် ခရီးကြွတော်မူစဉ် ရွာငယ်လေးတစ်ရွာသို့ ရောက်တော်မူကြလေသည်။ ထိုရွာရှိ သူဋ္ဌေးတစ်ယောက်သည် မြတ်စွာဘုရားနှင့် သံဃာတော်တို့အား  မိမိဥယျာဉ်တွင် ချမ်းသာစွာသီးတင်းသုံးရန် လျှောက်ထားလှူဒါန်းလေသည်။
သံဃာတော်များသည် ဥယျာဉ်စောင့်ကိုခေါ်ကာ ဥယျာဉ်ကို လှည့်လည်ကြည့်ရှုစဉ် မြေကွက်လပ်ကြီးတစ်နေရာကို တွေ့ရ၍ အဘယ်ကြောင့် ထိုနေရာတွင် မစိုက်ပျိုးရခြင်း အကြောင်းကို မေးမြန်းလေသည်။ ဥယျာဉ်စောင့်က “ဥယျာဉ်စိုက်ပျိုးချိန်က ဤနေရာတွင် စိုက်ပျိုးသောသူသည် အပင်များကိုနှုတ်ကာ အမြစ်အတို၊အရှည်တို့ကို တိုင်းတာပြီးမှ ရေလောင်းခြင်းကိုပြုသည်။ သည့်အတွက် အပင်တို့သည် ညိုးခြောက်သေကြသည်။ ထိုကြောင့် ဤနေရာတွင် မြေကွက်လပ်ကြီး ဖြစ်နေရပါသည်”ဟု ပြန်လျှောက်လေသည်။
ထိုအကြောင်းကို သံဃာတော်များမှတဆင့် မြတ်စွာဘုရားသိတော်မူ၍ “ဤသူသည် ယခုမှသာ ဤကဲ့သို့ပြုလုပ်သည်မဟုတ်သေး၊ ရှေးအခါကလည်း ပြုခဲ့ဘူးသည်သာ”ဟု မိန့်တော်မူ၏။  လွန်လေပြီးသောအခါ ဗာရဏသီပြည်တွင် ဗြဟ္မဒတ်မင်းအုပ်ချုပ်၏။ တစ်ခုသော နက္ခတ်သဘင် ပွဲတော်ကာလတွင် တိုင်းသူပြည်သားတို့သည် လှည့်လည်ပျော်ပါးကြကုန်၏။ ဘုရင့်ဥယျာဉ်မှူးသည်လည်း ထိုနက္ခတ်ပွဲသဘင်ရက်များတွင် ပျော်ရွှင်စွာ ပါဝင်ကစားလို၏။ တစ်တိုင်းပြည်လုံး ပါဝင်ဆင်နွဲသည့်ပွဲတော်ဖြစ်၍ ထိုရက်များအတွင်း ဥယျာဉ်တွင် အလုပ်ခိုင်းရန် လူရှာမရနိုင်သေကြောင့် အကြံထုတ်ရတော့သည်။
ထိုဘုရင့်ဥယျာဉ်တွင် မျောက်များနေထိုင်ကြသည်။ ဥယျာဉ်မှူးသည် မျောက်အကြီးအကဲ တစ်ကောင်ကို ခေါ်၍ “ငါ….မပြန်ရောက်မချင်း ဤဥယျာဉ်ရှိ သစ်ပင်ငယ်များကို ရေလောင်းထား”ဟု တာဝန်ပေးထားခဲ့လေသည်။
မျောက်အကြီးအကဲသည် အောက်လက်ငယ်သား မျောက်များကိုခေါ်၍ သစ်ပင်ငယ်များကို ရေလောင်ခိုင်းသည်။ ရေမလောင်းခင် ကြိုတင်မှာကြားသည်မှာ “အပင်တို့ကိုနှုတ်ကြည့်၍ အမြစ်ရှည်က ရေများများလောင်ရန်နှင့် အမြစ်တိုလျှင် ရေနည်းနည်းလောင်း” ဟူသတည်း။  ထိုမျှောက်အကြီးအကဲ၏ လမ်းညွှန်ချက်အတိုင်း မျောက်များလုပ်ဆောင်ကြလေတော့သည်။
အထက်ပါဖြစ်စဉ်တွင် အကျိုးကိုရှေးရှု၍ လုပ်သောသူများပင်ဖြစ်စေကာမူ အသိဥာဏ်နည်းလှသော သတ္တ၀ါများဖြစ်သည့်အတွက် အကျိုးမဲ့များကိုသာ လုပ်ဆောင်တတ်ပုံဖြစ်လေသည်။ မှန်ပေသည်။ လောကတွင် အသိဥာဏ်နည်းသူများ၊ ပညာမဲ့သူများကို တာဝန်ပေးရာတွင် ခေါင်းဆောင်ဖြစ်သူများအတွက် သတိပြု၊ ဆင်ခြင်ဖွယ် သာဓကတစ်ခုဖြစ်ပေသည်။
မျောက်ကို ဥယျာဉ်မှူးခန့်မိခြင်း၊ သူခိုးကို ဘဏ္ဍာတိုက်စောင့်ထားခြင်းတို့သည် ကြီးစွာသောအမှားများဖြစ်သည်။ ဤဇာတ်၏အဆုံးတွင် ညောင်ကန်ဆရာတော်မှ “ထိုက်သည့်ပညာ၊ ရှိသူသာ၊ ဆိုင်ရာဋ္ဌာနထား”ဟု ဇာတ်တော်လာသင်္ခန်းစာအနေဖြင့် လင်္ကာပြုကာ ဆုံးမထားသည်ကို တွေ့ရသည်။
“သားသမီးမကောင်း မိဘခေါင်း”၊ “တပည့်မကောင်း ဆရာ့ခေါင်း”စသည်တို့သည် စွမ်းအားကြီးလှသော ထိမိလှသော အများလက်ခံထားသော ဆုံးမစာများဖြစ်ပေသည်။ ပြစ်မှုတစ်ခုကို မိမိကိုယ်တိုင် မကျူးလွန်မိစေကာမူ ကျူးလွန်မိသကဲ့သို့ဖြစ်၏။ အကြောင်းရင်းမှာ တာဝန်ပျက်ကွက်မှုပင်ဖြစ်သည်။ ထိုအတူ အောက်လက်ငယ်သား မကောင်းလျှင်လည်း ခေါင်ဆောင်တွင် အဓိကတာဝန်ရှိသည်ဖြစ်၍ ထိုက်တန်သူအား တာဝန်ပေးတတ်ခြင်းသည် ခေါင်းဆောင်ကောင်းတို့ ရှိရမည့်အရည်အခြင်းတစ်ရပ်ဖြစ်သည်ကို အထက်ပါဖြစ်ရပ်များဖြင့် ချိန်ထိုးသိနိုင်ပေသည်။
မေတ္တာဖြင့်-
အရှင်ဥတ္တမာနန္ဒ (ပေရာဒေနိယတက္ကသိုလ်)
         Tuesday, June 19, 2012

ရည်ညွှန်း။      
၁။ ပုံတော်စုံ ငါးရာ့ငါးဆယ် ဇာတ်ဝတ္ထု၊ အာရာမဒူသကဇာတ် ၊ပ-တွဲ၊ ညောင်ကန်ဆရာတော်
၂။ ……..။ ပ ။……….. ဒု-တွဲ၊ ညောင်ကန်ဆရာတော်
၃။ King Asoka and Buddhism; Historical and Literary Studies, Rpt., Ed., By Anuradha Seneviratna, BPS, Kandy, Sri Lanka, 2007.

1 comments:

Unknown said...

Hi!Great and interesting blog you have:) Come and visit my site too. http://ads.com.mm/?cid=4fd60e65e4b0fa6db841e338&utm_campaign=ads_mm_lb_blog_martaste&utm_source=ads_lb_blog&utm_medium=lb_blog

Post a Comment